"Улады апынуліся ў сітуацыі, калі і хочацца і колецца. Яны добраахвотна ніколі б нічога не мянялі, бо баяцца рэформаў, сацыяльна-эканамічных і палітычных, і ўвесь час адкладаюць іх. З іншага боку, без падтрымкі Еўрасаюзу тыя самыя эканамічныя рэформы немагчымыя. А Брусэль патрабуе палітычнай лібералізацыі", - зазначае Аляксандр Мілінкевіч.
На ягоную думку, вельмі верагодна, што "мы зноў убачым гульню ў дэмакратызацыю, імітацыю". Напрыклад, мажарытарная сістэма выбараў у парламент будзе змененая на прапарцыйную, але галасы пры гэтым будуць лічыцца па-старому, кажа Мілінкевіч.
"Сапраўдны дэмантаж састарэлай палітычнай сістэмы магчымы толькі пасля вызвалення палітвязняў і поўнага спынення рэпрэсій, а таксама ўнутранага грамадска-палітычнага дыялогу, вынікам якога павінны стаць мадэрнізацыя заканадаўства і, галоўнае, якаснае змяненне прынцыпаў яго правапрымянення", - заявіў лідар Руху "За Свабоду”. | 
