Больш за чатыры мільёны рублёў перадаў Рух «За Свабоду» падчас акцыі ў падтрымку выдавецтва «Логвінаў», набыўшы кніжкі і частку сумы ахвяраваўшы.
«Улада вельмі баіцца свабоднага слова, свабоднага мыслення і ўвогуле незалежных ініцыятываў, хоча ўсё кантраляваць. Але якраз вольнае слова кантраляваць немагчыма», - пракаментаваў акцыю салідарнасці старшыня Руху «За Свабоду» Аляксандр Мілінкевіч.
Па ягоных словах, на такіх прыкладах «беларусам трэба вучыцца падтрымліваць адзін аднаго».
«Салідарнасць – адзінае, што мы можам супрацьпаставіць рэпрэсіўным дзеянням уладаў. І ў беларусаў ужо ёсць досвед паспяховых акцый салідарнасці па выплаце вялікіх штрафаў і дапамозе палітзняволеным. Падтрымка выдавецтва "Логвінаў" можа стаць яшчэ адным прыкладам», – сказаў першы намеснік старшыні Руху Юрась Губарэвіч.
Па ягоных словах, «дапамагаючы выжыць кнігарні праз набыццё і распаўсюд беларускай літаратуры, мы інвестуем ва ўласную будучыню».
У акцыі прынялі ўдзел старшыня Руху "За Свабоду" Аляксандр Мілінкевіч, намеснікі старшыні Юрась Губарэвіч і Алесь Лагвінец, а таксама прадпрымальнік, сябра Руху Мікалай Рамашын.
Дзіцячыя кніжкі, набытыя ў межах акцыі, былі перададзеныя кіраўніцтвам арганізацыі ў два дзіцячыя садкі Мінска.
http://pyx.by/bel/naviny/ruh/3929/
#SaveLohvinau | 
