Мінскі Еўрапейскі клуб і Беларускае добраахвотнае таварыства аховы помнікаў гісторыі і культуры пры падтрымцы агульнанацыянальнай кампаніі "Будзьма беларусамі" арганізавалі 19 жніўня чарговую паездку з цыклу "Падарожжа ў Еўропу". У гэта падарожжа сабралася каля 50 чалавек, каб пабываць у шэрагу мястэчак Бярэзінска-Дняпроўскага міжрэчча. Былі наведаныя Свіслач (замчышча, гістарычная мяшчанская забудова, брукаваны спуск да арчной прыстані), Стрэшын (Пакроўская царква канца 18-га стагоддзя, замчышча на беразе Дняпра, мяшчанская забудова), Жылічы (палацава-паркавы ансамбль Булгакаў кан. 18 – пач. 19 стст.), Красны Бераг (палацава-паркавы ансамбль Козел-Паклёўскіх кан. 19 ст., дзе цяпер вядуцца рэстаўрацыйныя работы, мемарыял дзіцячага канцэнтрацыйнага лагера часоў Другой сусветнай вайны), Бабруйск (ад забудоваў гістарычнага цэнтра да сінагогі). Экскурсіі праводзілі мясцовыя краязнаўцы і старшыня Беларускага добраахвотнага таварыства аховы помнікаў гісторыі і культуры Антон Астаповіч. Калі вы зацікавіліся гэтымі падарожжамі, то наступная вандроўка адбудзецца 16 верасня па мястэчках Смаргоншчыны, Астравеччыны і Ашмяншчыны (Гудагай, Гервяты, дзе знаходзіцца адзін з самых прыгожых беларускіх касцёлаў, Міхалішкі ды іншыя). Жадаючыя далучыцца ці атрымаць дадатковую інфармацыю могуць патэлефанаваць па тэлефоне (+37529)1694811 (Юрась Меляшкевіч).
Источник: http://pyx.by | 
