Прычына забароны, паводле райвыканкаму –
адсутнасць дамоў на абслугоўванне акцыі медыкамі, камунальнымі службамі і
міліцыяй. Аднак ні палікілініка, ні камунальнікі нават не адказалі на просьбу заяўнікаў аб заключэнні
дамоваў. А з міліцыі ліст прыйшоў ужо з канстатацыяй факта: "Дамовы не
будзе, бо акцыя ўжо забаронена". Адзін
з заяўнікаў акцыі, удзельнік сёлетняй выбарчай кампаніі Зміцер Лупач, распавёў, што заява ў райвыканкам
была накіравана ў той самы дзень, як і лісты да адказных службаў: "Выканкам паспяшаўся, адказаў нам праз 10 дзён. Следам за
лістом пра забарону акцыі прыйшоў адказ з райаддзела міліцыі. З яго вынікае,
што міліцэйскае кіраўніцтва знарок чакала, пакуль нам адмовяць. Бо агульны сэнс
ліста такі: маўляў, вам забаранілі праводзіць акцыю, значыць, і мы дамову лічым
немэтазгоднай. Камунальная служба і паліклініка маўчаць дагэтуль, не кажуць нам
ні "так", ні "не". Каб адказы прыйшлі своечасова і былі
станоўчыя, то да 15 сакавіка мы б паспелі яшчэ раз звярнуцца ў выканкам наконт
правядзення пікета да Дня Канстытуцыі". Пікет да Дня Канстытуцыі мусіў быць доказам павагі з боку
дзяржавы да асноўнага дзяржаўнага дакументу, дзе прапісаныя галоўныя правы
грамадзян, лічаць заяўнікі забароненай
акцыі, глыбоцкія актывісты Яраслаў Берніковіч і Зміцер
Лупач. З імі цалкам салідарныя і віцебскія аднадумцы
- Аляксей Гаўруцікаў, актывіст аргкамітэту па стварэнні сацыял-дэмакратычнай
партыі "Народная Грамада", і кіраўнік абласной структуры руху
"За Свабоду" Хрыстафор Жаляпаў. Яны таксама падавалі заяўку на пікет да Дня
Канстытуцыі, і таксама атрымалі адмову. Прычына адмовы – такая самая, як і ў
Глыбокім, удакладняе Аляксей Гаўруцікаў: "Мы не змаглі
разам з заяўкай прадставіць дамовы на абслугоўванне акцыі. З паліклінікі , напрыклад, нам напісалі,
што да 15 сакавіка яшчэ багата часу, і яны не могуць паабяцаць, што ў той дзень знойдзецца брыгада
хуткай дапамогі для дзяжурства. А міліцыянты даслалі стандартную
"адпіску", што будуць разглядаць нашу прапанову толькі пасля таго, як
акцыю дазволяць улады. Але ж ад нас,
заяўнікаў, патрабуецца выкананне рашэння №881 Віцебскага гарсавету, паводле
якога папярэднія дамоўленасці – абавязковыя".
Падобнае патрабаванне сфармулявана і ў
рашэнні №167 "Аб вызначэнні месцаў для правядзення
мітынгаў і пікетавання" Глыбоцкага
райвыканкаму, і ў рашэнні №74 "Аб некаторых пытаннях арганізацыі масавых мерапрыемстваў у
горадзе Орша" Аршанскага гарвыканкаму. Цяпер актывісты з розных
рэгіёнаў Віцебшчыны спрабуюць вырашыць праблему арганізацыі акцый праз суд: дамагчыся таго, каб
адказныя службы ўсё ж пагаджаліся на заключэнне дамоваў. | 
