Мясцовыя актывісты нават
не сталі падаваць заяўку ў райвыканкам.
Бо вынік стаў вядомы яшчэ на папярэднім
этапе: ні міліцыя, ні медыкі, ні камунальнае прадпрыемства "Спецаўтабаза "
не пагадзіліся заключаць дамовы на
абслугоўванне акцыі з заяўнікамі Ігарам Казмерчаком і Алесем Шутавым . А без
такіх дамоваў атрымаць дазвол на акцыю немагчыма.
Неабходнасць папярэдняга
заключэння дамоваў зафіксавана ў рашэнні Аршанскага гарвыканкама №74 "Аб
некаторых пытаннях арганізацыі масавых мерапрыемстваў у горадзе Орша". Усе
папярэднія спробы арганізаваць у горадзе нейкія акцыі сканчваліся забаронамі
якраз з-за адсутнасці такіх дамоваў.
Напярэдадні Дня Волі было
вырашана дакладна выканаць усе патрабаванні рашэння гарвыканкаму, распавёў
адзін з заяўнікаў, Ігар Казмярчак:
"Мы даслалі лісты з
прапановамі заключыць дамовы ва ўсе службы, згаданыя ў гэтым рашэнні . І на ўсе
тры лісты аьрымалі адмовы. Прадпрыемства
"Спецаўтабаза" адказала, што ў іх няма вытворчых магчымасцяў. Бо
якраз цяпер сыходзіць снег, і ўсе работнікі занятыя прыборкай гораду. Так што 25 сакавіка
пасля 2-гадзінавай акцыі, на якой мы й не збіраліся раскідваць смецце, прыбраць
проста няма каму... З паліклінікі прыйшла адмова з паведамленнем, што ў іх няма
такой паслугі, як абслугоўванне акцый, і
няма прэйскуранту для аплаты. А з
міліцыі паведамілі, што мэтазгодна было б абмяркоўваць нейкія
дамовы толькі пасля таго, як дазвол на акцыю будзе атрыманы. Гэта значыць, што
міліцэйскае кіраўніцтва не прызнае парадак, прапісаны ў рашэнні мясцовых
уладаў. У РАУСе лічаць, што спачатку мы
мусім атрымаць дазвол ад выканкаму, а ў выканкаме – што папярэдне трэба
дамаўляцца з ахоўнікамі правапарадку. Зноў замкнёная кола, з якога няма
выйсця".
Сітуацыя, у якой
апынулімся сябры партыі БНФ Ігар
Казмярчак і Алесь Шутаў, ужо не новая. Рашэнне гарвыканкама №74 "Аб некаторых
пытаннях арганізацыі масавых мерапрыемстваў у горадзе Орша" складзена
такім чынам, што прапісаныя там умовы невыканальныя. Аршанскія актывісты Юрый
Нагорны і Яўген Анішчанка, трапіўшы ў такое самае становішча, спрабавалі
бараніць сваё права на правядзенне масавых акцый праз суд. Але і гэта не дапамагло: якраз падчас працэсу і высветлілася, што ўлады
лічаць неабходным выкананне адпаведнага рашэння толькі для заяўнікаў. А ўсе
згаданыя там адказныя структуры проста
не гатовыя яго выконваць: прадстаўнікі
паліклінікі цвердзяць, што ў пераліку відаў іх камерцыйнай дзейнасці няма такой
паслугі, прадпрыемства
"Спецаўтабаза" прыборкай гарадскіх тэрыторый не займаецца ўвогуле, а
толькі вывозіць смецце. А міліцыя нават не абмяркоўвае магчымасць папярэдняга
заключэння дамоваў – цвердзіць, што гатовая да супрацоўніцтва толькі пасля
атрымання дазволу . Да ўсяго, і першыя,
і другія, і трэція ніколі не заключалі дамоў з фізічнымі асобамі, і гэта
ўвогуле не прадугледжана ў іхнай прафесійнай дзейнасці.
З той самай прычыны –
праз адсутнасць папярэдніх дамоваў на абслугоўванне - акцыі да Дня Волі былі забаронены мясцовымі
ўладамі ў
Глыбокім і ў Віцебску.
| 
