Цяпер ва Уладзіміра Правальскага, які хацеў быць кандыдатам у дэпутаты абласнога Савету, таксама паўсталі праблемы з дакументамі. Пра гэта распавёў сябра абласной выбарчай камісіі, кіраўнік абласной арганізацыі Партыі левых "Справядлівы свет" Мікалай Селівашка: "Уладзімір Правальскі – пакуль адзіны, хто падаў скаргу на тое, што не зарэгістравалі яго ініцыятыўную групу. Ён кажа, што звяртаўся да сяброў камісіі, каб перагледзелі ягоныя дакументы і падказалі, калі нешта не так. І што нібыта ніякіх заўваг да яго не было. Але ініцыятыўную групу не зарэгістравалі менавіта праз недакладнасці ў сабраных дакументах. Я прапанаваў склікаць пасяджэнне абласной камісіі і ўсё ж зарэгістраваць групу Правальскага – раз яму не далі ніякіх тлумачэнняў. Тым больш, што недакладнасці там чыста "тэхнічныя", не грунтоўныя. Але камісію з гэтай нагоды склікаць не сталі". Пра тое, каб не зарэгістравалі ініцыятыўную групу кагосьці з дэмакратычных актывістаў на Віцебшчыне, звестак няма. Паводле афіцыйнай інфармацыі з сайту аблваканкама, на рэгістрацыю ініцыятыўных груп было пададзена 2 362 заявы, зарэгістравана 2 356 груп. Сярод заяўнікаў былі і сябры палітычных партый, якія вырашылі стварыць ініцыятыўныя групы і збіраць подпісы за сябе, не чакаючы вылучэння ад партыйных суполак. 42 чалавекі ўказалі сваю партыйную прыналежнасць, і найбольш масава прадстаўленымі аказаліся Партыя левых "Справядлівы свет" (11 чалавек), КПБ (10 чалавек), Партыя БНФ (9 чалавек). Аднак на сайце абласной газеты "Витебские вести" у артыкуле "Выбарчыя камісіі прыступілі да разгляду заяваў на рэгістрацыю ініцыятыўных груп", прысвечаным храналогіі сёлетняй выбарчай кампаніі, чытачоў пераконваюць, што ў вобласці існуе ўсяго адна палітычныя партыя. Журналіст Вольга Маслоўская так і піша пра этап партыйнага вылучэння патэнцыйных кандыдатаў: "У дадзены момант па вобласці праходзяць пасяджэнні кіруючых органаў палітычнай партыі, … дзе вызначаюцца з вылучэнцамі". Якую ж партыю мае на ўвазе абласная газета, не ўдакладняецца. І ні аблвыканкам, ні выбарчыя камісіі, ні самі партыйцы чамусці не спяшаюцца ўказаць дзяржаўнаму выданню на відавочную палітычную памылку.
Источник: http://spring96.org/be/news/68621 | 
