Прыводзім тэкст выступу, які не прагучаў. Абзац, з-за якога выступ не трапіў у эфір, выдзелены. Добры дзень паважаныя выбаршчыкі! Я рады нашай сустрэчы ў радыёэфіры і спадзяюся на сустрэчу тварам да твару. Мікалай Дзямідаў, кандыдат у дэпутаты Аршанскага раённага Савета па Чарнышэўскай выбарчай акрузе № 4. Вылучылі мяне выбаршчыкі акругі і Беларуская партыя левых «Справядлівы свет». Партыя аб'ядноўвае людзей, якія хочуць добрай сучаснасці і лепшай будучыні для Беларусі, хочуць пераменаў у эканоміцы краіны, павышэння ўзроўню жыцця нашых грамадзян. Партыя «Справядлівы свет» лічыць, што цяперашняя ўлада гэта зрабіць не можа і яе трэба мяняць. Не справіўшчыся з эканамічным крызісам, чыноўнікі ўвесь цяжар яго наступстваў, усе свае памылкі перакладаюць на плечы грамадзян, пастаянна павышаюць цэны, тарыфы, прыдумляюць новыя падаткі і зборы. Будуюць на народныя грошы новыя палацы і рэзідэнцыі, закупляюць дарагі транспарт, увесь час трацяць сродкі на бяздзейныя мерапрыемствы. Нашы ж даходы не паспяваюць за нястрымным ростам коштаў. Каб звесці канцы з канцамі, даводзіцца абмяжоўваць сябе і сваіх дзяцей літаральна ва ўсім. Што простым людзям чакаць ад заўтрашняга дня? Новых праблем і ніякіх перспектываў да лепшага. Кожны думае пра тое, што яшчэ падаражэе, як пражыць, хто дапаможа. Хлусня, карупцыя і самавольства ўладаў, безнадзейнасць і страх сталі нормай. Людзі губляюць веру ў справядлівасць. Чаму так адбываецца? Таму што ў краіне няма свабодных і сумленных выбараў. Дэпутатаў усіх узроўняў не абіраюць. Іх прызначаюць тыя ж чыноўнікі. Прытым прызначаюць паслухмяных, залежных ад выканаўчай улады людзей, якія прымаюць і ўхваляюць усё, у тым ліку і антынародныя рашэнні. Вы добра бачыце, як сёння ў рэгіёне растуць карупцыя і крадзяжы, з'явіліся выпадкі педафіліі, руйнуецца мост праз Днепр у раёне льнокамбіната, практычна не паляпшаецца якасць пітной вады. Усё гэта стала магчымым пры бяздзейнасці ўлады і з маўклівай згоды дзеючых дэпутатаў мясцовых Саветаў, якія не заўважаюць гэтых праблем. Улада робіць усё, каб не дапусціць удзелу грамадзян у вызначэнні шляхоў развіцця краіны, горада, раёна. Любыя спробы выступаць супраць антынароднай палітыкі жорстка душацца. Мітынгі, дэманстрацыі, пікеты , забастоўкі забароненыя. У розныя выбарчыя камісіі горада Орша не ўключылі больш за 10 прадстаўнікоў партыі. Чаго баяцца ? Баяцца, што мы запатрабуем сумленнага падліку галасоў і не дапусцім фальсіфікацый. Усё гэта супярэчыць Канстытуцыі і інтарэсам грамадзян, пазбаўляе іх права выбару. Дзе ж выйсце? Ісці ці не ісці на выбары кожны вырашае сам. Але лежачы на канапе, абураючыся дзеяннямі ўладаў на кухні ці ў Інтэрнэце, зменаў да лепшага не дамагчыся. Партыя «Справядлівы свет» заклікае ўсіх да барацьбы за свабодныя і сумленныя выбары. Нам трэба разам дамагацца змен да лепшага. У нас ёсць канкрэтныя праграмы рашэння дзяржаўных і мясцовых праблем, але вырашыць іх можна толькі пры ўмове правядзення свабодных і сумленных выбараў. Нам усім патрэбна справядлівая ўлада, абраная на справядлівых выбарах. Патрабаваць гэтага ад улады можа кожны. Не дайце сябе падмануць, станавіцеся назіральнікамі, сумленна працуйце ў выбарчых камісіях, процідзейнічайце фальсіфікацый, не галасуйце датэрмінова, растлумачвайце сітуацыю сябрам і знаёмым. Ўсё застанецца па-ранейшаму, калі не дамагацца таго, каб на выбарах грамадзяне абіралі тых, каму давяраюць, і хто будзе здольны працаваць у інтарэсах людзей. Партыя «Справядлівы свет» дае Вам альтэрнатыву. І апошняе. Прыярытэтам для мяне будзе абарона правоў і свабод людзей. Я буду дапамагаць Вам у адстойванні вашых інтарэсаў. Разам мы створым ўладу, якая будзе працаваць у інтарэсах людзей. Толькі разам мы даможамся справядлівасці! Толькі разам мы пераможам! З павагай, кандыдат у дэпутаты па Чарнышэўскай выбарчай акрузе № 4, ваш Мікалай Дзямідаў.
| 
